தேவையா உலக நாயகன் பட்டம்?? - கமலுக்கு ஒரு கடிதம்

அன்புள்ள கமல் ஹாசன் அவர்களுக்கு ..,
            தமிழ் திரையுலகில் உள்ள நாயகர்களுள் வித்தியாசமானவர் நீங்கள் .., தன்னுடய ரசிகர்கள் வெறும் விசிலடிச்சான்குஞ்சுகளாக இருக்க வேண்டும் என்று எப்போதுமே நீங்கள் விரும்பியதில்லை. உங்கள் பிறந்தநாளன்று  உங்களுக்கு பாலபிஷேகமோ பீராபிஷேகமோ உங்கள் ரசிகர்கள் செய்ய வேண்டும் என்று எதிர்ப்பார்க்காமல் நல திட்ட உதவிகளும் இரத்த தான முகாம்களும் நடத்த வைத்தவர்.
     
              உங்களுக்கு ஆங்கிலம் எவ்வளவு தெரியும் என்பது அனைவருக்கும் தெரியும் ஆனாலும் எந்த மேடை ஏறினாலும் சுத்த தமிழை மட்டுமே பேசுபவர்.என்னுடைய முகத்தை நான் தினமும் கண்ணாடியில் பார்க்கிறேன் என்னால் இனிமேல் கல்லூரிக்கு போய் சைட் அடிக்கும் படி எல்லாம் நடிக்க முடியாது என்று தைரியமாக உடைத்து கூறியவர் நீங்கள்.

            முதன்முதலில் உடல்தானம் செய்த நடிகர் நீங்கள் தான் நீங்கள் செய்ததோடு மட்டும் நில்லாமல் ரசிகர்களையும் செய்யும் படி தூண்டியவர் நீங்கள்.ஆஸ்பத்திரியில் அம்மணமாக வைத்து இருப்பார்களே என்று சிலர் பழித்த போது அப்படி தானே பிறந்தோம் என்று அழுத்தமாக பதில் சொன்னவர் நீங்கள். ரசிகர் மன்றஙகளை நற்பணி மன்றங்களாக முதல் முறையாக மாற்றி உங்களுடைய சமூக பொறுப்பை காட்டினீர்கள்.
      
           பணத்திற்காக என்று இல்லாமல் வாக்கு அளிப்பதன் மற்றும் வரி கட்ட வேண்டியதன் அவசியத்தை வலியுறுத்தியும் எய்ட்ஸ் விழிப்புண்ர்வு ஏற்படுத்துவதற்காகவும் விளம்பரத்தில் தோன்றி மற்றவர்களுக்கு முன்னுதாரனமாக விளங்குபவர்.தனக்கு கிடைக்காத்து மற்றவர்களுக்காவது கிடைக்கட்டும் என்ற எண்ணத்தில் சினிமா கனவோடு அலையும் இளைஞர்களுக்கு ப்யிற்சி பட்டறை நடத்தி  அவர்களுக்கும் சினிமா பற்றிய புரிதலை ஏற்படுத்தியவர் நீங்கள்.

           இது எல்லாவற்றுக்கும் மேலாக தமிழ் சினிமாவை அடுத்த கட்டத்திற்க்கு எடுத்து செல்வதற்க்காக நீண்ட நாட்களாக போராடி வருபவர்.இன்று வித்தியாசமாக படமெடுப்போர் அனைவரும் நீங்கள் கஷ்ட பட்டு போட்ட சாலையில் சுகமாக நடந்து வந்தவர்களே..,

           இத்தனை விஷயங்களை முற்போக்காக யோசித்து செய்த உங்களுக்கு கலைஞானி , உலக நாயகன் போன்ற பட்டங்கள் நகைப்புக்குறியதாக இல்லையா..,நீங்கள் உலக நாயகனாக இருந்தால் அப்படி பட்ட பெயர் வைத்து கொள்வதில் எங்களுக்கெல்லாம் சந்தோஷமே ஆனால் நீங்கள் உலக நாயகனாக இருந்திருந்தால் உங்களை கனடா விமான நிலையத்தில் வைத்து ஒரு மணி நேரத்திற்க்கு மேலாக விசாரணை நடத்தி இருக்க மாட்டார்களே..,  உங்களை பார்த்து நடிப்பதாக சொல்லும் சூர்யா , விக்ரம் போன்ற நடிகர்கள் பட்டங்கள் ஏதும் வேண்டாம் என்று பட்டங்கள் இல்லாமலே நடித்து வருகின்றனர் அவர்கள் வரிசையில் அஜித்தும் சேர்ந்து விட்டார்.

           ஆகவே இனியும் தாமதிக்காமல் உலக நாயகன் பட்டத்தை துறந்து அரசாங்கம் கொடுத்த பட்டமான பத்ம ஸ்ரீ கமல் ஹாசனாகவே தொடருங்கள்.அப்படி செய்வதன் மூலம் இளைய , புரட்சி , சின்ன , குட்டி , நெட்டை , எழுச்சி , வீர ,சிகப்பு , பச்சை ஆகிய தளபதிகளுக்கும் லிட்டில் , யங் , மங் , சங் சூப்பர் ஸ்டார்களுக்கும்  முன்னுதாரணமாக விளங்குமாறு கேட்டு கொள்கிறோம்...,

இப்படிக்கு..,
ஒரு ரசிகன்...,
            .
            .